Liturgy for Psalms 3:2

וִיהִי נֹֽעַם אֲדֹנָי אֱלֹהֵֽינוּ עָלֵֽינוּ וּמַעֲשֵׂה יָדֵֽינוּ כּוֹנְנָה עָלֵֽינוּ וּמַעֲשֵׂה יָדֵֽינוּ כּוֹנְנֵֽהוּ:

יְהֹוָה מָה־רַבּוּ צָרָי רַבִּים קָמִים עָלָי: רַבִּים אֹמְ֒רִים לְנַפְשִׁי אֵין יְשׁוּעָֽתָה לוֹ בֵאלֺהִים סֶֽלָה: וְאַתָּה יְהֹוָה מָגֵן בַּעֲדִי כְּבוֹדִי וּמֵרִים רֹאשִׁי: קוֹלִי אֶל־יְהֹוָה אֶקְרָא וַיַּעֲנֵֽנִי מֵהַר קָדְשׁוֹ סֶֽלָה: אֲנִי שָׁכַֽבְתִּי וָאִישָֽׁנָה הֱקִיצֽוֹתִי כִּי יְהֹוָה יִסְמְ֒כֵֽנִי: לֺא אִירָא מֵרִבְבוֹת עָם אֲשֶׁר סָבִיב שָֽׁתוּ עָלָי: קוּמָה יְהֹוָה הוֹשִׁיעֵֽנִי אֱלֺהַי כִּי־הִכִּֽיתָ אֶת־כָּל אֹיְ֒בַי לֶֽחִי שִׁנֵּי רְשָׁעִים שִׁבַּֽרְתָּ: לַיהוָֹה הַיְ֒שׁוּעָה עַל־עַמְּ֒ךָ בִרְכָתֶֽךָ סֶֽלָה: