תרגום על אסתר 9:14

וַאֲמַר מַלְכָּא לְאִתְעַבְדָא כְּדֵין וְאִתְיְהִיבַת גִזֵירַת דִינָא בְשׁוּשַׁן וְיַת עֲשַׂרְתֵּי בְנוֹי דְהָמָן צְלִיבוּ: וְדֵין סִדוּר צְלִיבַתְהוֹן דְאִצְטְלִיבוּ עִם הָמָן אֲבוּהוֹן עַל קֵיסָא דְזַמֵן לְמָרְדְכַי רוּמֵיהּ חַמְשִׁין אַמִין תְּלַת אַמִין הֲוָה נָעִיץ בְּאַרְעָא וְאַרְבַּע אַמִין וּפַלְגָא הֲוָה רָחִיק פַּרְשַׁנְדָתָא מִן אַרְעָא וּפַרְשַׁנְדָתָא הֲוָה צְלִיב בִּתְלַת אַמִין וַהֲוָה רָחִיק מִן דַלְפוֹן פַּלְגוּת אַמְתָא. דַלְפוֹן הֲוָה צְלִיב בִּתְלַת אַמִין וַהֲוָה רָחִיק מִן אַסְפָּתָא פַּלְגוּת אַמְתָא. אַסְפָּתָא הֲוָה צְלִיב בִּתְלַת אַמִין וַהֲוָה רָחִיק מִן פּוֹרָתָא פַּלְגוּת אַמְתָא. פּוֹרָתָא הֲוָה צְלִיב בִּתְלַת אַמִין וַהֲוָה רָחִיק מִן אֲדַלְיָא פַּלְגוּת אַמְתָא. אֲדַלְיָא הֲוָה צְלִיב בִּתְלַת אַמִין וַהֲוָה רָחִיק מִן אֲרִידָתָא פַּלְגוּת אַמְתָא. אֲרִידָתָא הֲוָה צְלִיב בִּתְלַת אַמִין וַהֲוָה רָחִיק מִן פַּרְמַשְׁתָא פַּלְגוּת אַמְתָא. פַּרְמַשְׁתָּא הֲוָה צְלִיב בִּתְלַת אַמִין וַהֲוָה רָחִיק מִן אֲרִיסַי פַּלְגוּת אַמְתָא. אֲרִיסַי הֲוָה צְלִיב בִּתְלַת אַמִין וַהֲוָה רָחִיק מִן אֲרִידַי פַּלְגוּת אַמְתָא. אֲרִידַי הֲוָה צְלִיב בִתְלַת אַמִין וַהֲוָה רָחִיק מִן וַיְזָתָא פַּלְגוּת אַמְתָא. וַיְזָתָא הֲוָה צְלִיב בִּתְלַת אַמִין וַהֲוָה רָחִיק מִן הָמָן פַּלְגוּת אַמְתָא. הָמָן הֲוָה צְלִיב בִּתְלַת אַמִין וַהֲוָה רָחִיק עַל רֵישֵׁיהּ תְּלַת אַמִין בְּגִין דְלָא יִיכוּל מִנֵיהּ עוֹפָא וְזֶרֶשׁ עַרְקַת עִם שַׁבְעִין בְּנִין דְאִישְׁתַּאֲרוּ לְהָמָן דַהֲווּ הַדְרִין עַל תַּרְעַיָא וּמִתְפַּרְנְסִין וְשַׁמְשַׁי סַפְרָא אִתְקְטֵיל בְּסֵייְפָא וּמְאָה וְתַמְנַיָא מִיתוּ עִם חַמֵשׁ מְאָה גוּבְרִין דְאִיתְקְטִילוּ בְּשׁוּשַׁן דַהֲווּ אִיתְמַנָן עַל אַשְׁקָקֵי מַלְכָּא: